Comunicacións

O Concello de Begonte ten unha lonxitude de estradas superior ós 210 kilómetros, dos que máis de 120 forman a rede municipal de pequenas estradas, baseada nos antigos camiños, de responsabilidade municipal.
As estradas begontinas presentan a seguinte clasificación:

Rede estatal:

Autovía do Noroeste (A 6)
Estrada Nacional Madrid-Coruña (N VI)
Estrada Nacional S. Sebastián-Baamonde (N. 634)

Rede autonómica:
Estrada comarcal Rábade-Ferrol, pasando por Vilalba (C. 641)
Estrada autonómica Rábade-Cospeito (Lu-111).
Rede provincial:
Cinturón de Lugo (Pr.16-11)
Rede municipal:
Antigos camiños, ensanchados e alquitranados

A Autovía do Noroeste, como antes a Nacional VI, e a línea de ferrocarril dividen ó Concello en dúas amplas zonas, de este a oeste. Pero esta división artificial non fai máis que reforza-la división natural que fai a depresión formada polos ríos Ladra e Parga, que no mesmo sentido atravesan o territorio do Concello.
A Autovía do Noroeste complementa máis que substitúe á antiga Nacional VI, que segue en funcionamento, aínda que de forma máis repousada e servindo especialmente ó tráfico comarcal. Ámbalas dúas conectan Begonte e todo o centro chairego coa costa coruñesa e coa meseta, constituíndo a máis importante –polo de agora- vía de comunicación do Concello de Begonte.

A N. 634 (San Sebastián-Santander - A Coruña), entronca en Baamonde coa N VI, e conecta ó concello coa capital comarcal, e desde ela coa costa lucense, coas Pontes e Ferrol. Esta vía, nun próximo futuro, será substituída ou complementada coa A 8 que ven da Costa lucense entroncar coa autovía Madrid-Coruña, recibindo á súa vez a vía rápida que se está a construír entre Ferrol e Vilalba, co que se reforzará cada vez máis o papel deste concello como núcleo de comunicacións.
A comarcal 641, que de Rábade vai a Vilalba, constitúe unha importante vía de comunicación para a zona norte do concello, sendo outra opción de acceso á capital da comarca e, con ela, á costa lucense, as Pontes e Ferrol.   A Lu-111, que desde a C. 641 en Rábade vai ó concello de Cospeito, proporciona excelente comunicación a toda a zona oriental begontina.
A construción da estrada Pr-16-11 pola Deputación Provincial de Lugo, como parte do chamado Cinturón de Lugo, completa a comunicación Norte-Sur do Concello, enlazando amplas zonas de Begonte con outras dos concellos de Cospeito e Friol.
Esto, polo que a vías principais se refire, porque as comunicacións internas entre as diversas parroquias do concello de Begonte efectúanse a través dunha tupida rede de pequenas estradas, os antigos camiños veciñais asfaltados, que enlazan tódolos núcleos de poboación do termo municipal entre sí e coas localidades limítrofes. 

Son un total de 85 vías municipais cunha extensión total de 128 kilómetros.