O Territorio

Para Río Barja, o clima da comarca é “subcontinental húmido dentro do macroclima oceánico de Galicia”.
O clima begontino pódese xulgar de temperado medio, con invernos moderados e veráns sen rigores.
É un clima que poderiamos denominar “humano”, no que a vida se desenvolve nas mellores condicións climatolóxicas e sociais.
A maior parte do terreo do concello é apto para a agricultura, sendo a capacidade de produción do solo de tipo medio. Cómpre utilizar fertilizantes químicos para corrixir a acidez e a escaseza dalgúns elementos, e orgánicos para reposición de materia consumida polos cultivos.

A planura do terreo favorece a mecanización do traballo na terra, e a agricultura e a gandeiría segue a ser a fonte de ingresos máis importantes do concello, co necesario e paulatino trasvase á industria e servizos.

RÍOS

Os ríos Parga e Ladra regan e cruzan o territorio begontino. Xúntanse en Pacios, e van desembocar no Río Miño, xa no Concello de Outeiro de Rei. O Río Miño separa Begonte do territorio de Outeiro de Rei, e o Támoga do de Cospeito. A xuntanza do Támoga co Miño forma a illa de San Roque no punto onde limitan os concellos de Begonte, Outeiro de Rei e Cospeito.
Mención especial merecen as Lagoas do Ollo e Riocaldo, ás que hai que engadir as orixinadas pola extracción de áridos nas inmediacións da de Riocaldo.

As lagoas teñen un excelente futuro cunha dobre vertente: a observación e potenciación da natureza, desde o punto de vista medioambiental e unha racional explotación turística que contemple a súa singularidade.
Diante da idea expresada recentemente de facer unha ruta turística e da natureza, as lagoas de Begonte teñen que ser lugares de obrigada visita.

NATURA 2000

Begonte está incluído entre os concellos considerados lugares privilexiados da Rede Natura 2000, e así unha zona do seu territorio forma parte do L.I.C. (Lugar de importancia comunitaria) Parga-Ladra-Támoga, que comprende ribeiras dos ríos Parga, Ladra, Támoga e Miño, e as lagoas de Riocaldo.