Segundo o censo de 1999, a poboación do concello de Begonte é de 3.873 habitantes, dos que 1.924 son homes e 1.949 mulleres.
Esta poboación, a comezos do século XX, era de arredor de 6.500 persoas, pero as causas que incidiron na maior parte do territorio galego, no resto da comarca e da provincia de Lugo, foron mermando a poboación. O brusco descenso nas taxas de natalidade, o mantemento da taxa de defuncións, e o fenómeno da emigración en favor dos grandes núcleos ou do exterior, foron os factores que orixinaron este descenso.
As parroquias máis poboadas na actualidade son as da zona central do Concello – Saavedra, Baamonde e Begonte- situadas preto das máis importantes vías de comunicación e, no caso de Baamonde e Begonte, pola existencia de núcleos urbanos, e con eles unha maior concentración de servizos municipais.
A densidade de poboación é de 81,11 habitantes por kilómetro cadrado na capital do Concello, 69,29 en Carral, 51,01 en Baamonde, e 50,32 en Saavedra.
O fenómeno da inmigración ten xa unha certa importancia en Begonte, polo crecente papel dos polígonos industriais no concello, e pola xente que volve despois da súa xubilación.